වරුන්ගේ නිවුන් සොයුරෝ
චිත‍්‍රපටි අධ්‍යක්ෂ කරන් ජෝහාර්, වරුන් ධාවාන්ට සළකන්නේ ඔහුගේම පුතෙකුට බඳුවය. නොටින්හැම් ටේරන්ට් සරසවියෙන් ව්‍යාපාර කළමනාකරණ උපාධිය ලබාගත් වරුන් පළමුව ක්ෂේත‍්‍රයට ආවේ කරන්ගේ මයි නේම් ඉස් ඛාන් චිත‍්‍රපටියේ සහාය අධ්‍යක්ෂ වශයෙනි. ඉන්පසුව 2012 දී කරන්ගේ ස්ටුඩන්ට් ඔෆ් ද ඉයර් චිත‍්‍රපටියේ රඟපා ක්ෂේත‍්‍රයේ ස්ථාවර බවට පත්වූයේය.
කුලියට ගත් ගර්භාෂයක් මගින් නිවුන් දරුවන් දෙදෙනෙකු බිහි කරවාගෙන කරන් මෑතකදී තාත්තා කෙනෙකු වූයේය. රූහි හා යාෂ් නම් වූ ඒ දරුවන් දෙදෙනාට වරුන් සළකන්නේ තමාගේම සොයුරන්ට බඳුවය. ඔවුන්ට තෑගි මිලදී ගැනීම පිණිස ඔහු සාප්පු සංචාරවලද යෙදෙන්නේය.
‘‘මම තෝරන තෑගිවලට ඒ දෙන්නා කැමති වෙයි කියල මං හිතනවා..’’ ඔහු කියයි.
මේ දිනවල ඔහු සිය ඊළඟ චිත‍්‍රපටිය ජුඞ්වා 2 සඳහා සූදානම් වෙමින් සිටින්නේය. එය අධ්‍යක්ෂණය කරනු ලබන්නේ ඔහුගේ පියා ඬේවිඞ් ධාවාන් විසිනි. මේ චිත‍්‍රපටිය දශක දෙකකට පමණ ඉහතදී සල්මන් රඟපෑ හාස්‍යජනක චිත‍්‍රපටියක දිගුවකි.
‘‘මම ළඟදීම ලන්ඩන්වලට යනවා. චිත‍්‍රපටියේ වැඩිකොටසක් රූගත කෙරෙන්නෙ ලන්ඩන්වල... චිත‍්‍රපටිය පටන් ගන්න ඉස්සර මට කරන්න හුඟාක් දේවල් තියෙනවා....’’ වරුන් කියයි.
