රැප් ගායක ජේට විශේෂ සම්මානයක්
රැප් ගායක ජේ. ඉසෙඩ් ළඟදීම ගෞරව සම්මානයකින් පිදුම් ලැබීමට නියමිතය. ඒ, ග්‍රැමි සම්මාන උලෙළට පෙර පැවැත්වෙන විශේෂ උත්සව අවස්ථාවේදීයි. හොලිවුඩ් ආරංචි මාර්ග වල සඳහන් වන්නේ ලබන ජනවාරි 27දා පැවැත්වෙන මේ උත්සවයේදී ක්ලයිව් ඩේවිස් අතින් ජේ - ඉසෙඩ් වෙත ගෞරව සම්මානය පිරිනැමෙන බවයි. ජේ - ඉසෙඩ් කිහිප වතාවක්ම ග්‍රැමි සම්මානය දිනාගත් රැප් ගායකයෙකි. ඔහු සංගීත ලොවට පමණක් නොවෙයි, මානව හිතවාදියෙකු ලෙස සමාජ සේවා කටයුතුවලට දැක්වූ අනගි දායකත්වය අගය කරමින් මෙම සම්මානය පිරිනැමෙන බවයි පැවසෙන්නේ.
මේ අවස්ථාව ඇමරිකාවේ නිව්යෝර්ක් ටයිම්ස් චතුරශ්‍රයේදී පැවැත්වීමට නියමිතය. මෙම සම්මානය පිරිනැමීමත් සමගම මීට පෙර මෙවැනිම සම්මානයන්ගෙන් පිදුම් ලද ක්ලයිව් ඩේවිස්, හර්බ් ඇල්බට්, ජෙරී මොස් ඇතුළු සංගීත ලොවට අගනා මෙහෙයක් ඉටුකළ ගෞරවනීය පුද්ගලයන්ගේ නම් ලැයිස්තුවට ජේ - ඉසෙඩ්ගේ නාමයද එක්වේ.
