මෙරිල් ස්ට්‍රීප් පැවැත්වූ කතාවට ඇගයුම් මෙන්ම විවේචනද එල්ල වෙයි - ජනාධිපති ට්‍රම්ප් පිළිතුරු දෙයි
පසුගිය වසරේ තිරගත වූ ඇමෙරිකානු චිත්‍රපටවලට මෙන්ම රූපවාහිනී කතාමාලාවන්ටද සම්මාන ලබාදෙන ජනප්‍රිය සම්මාන උලෙළක් වන ගෝල්ඩන් ග්ලෝබ් සම්මාන උලෙළ පසුගිය 08 වැනිදා රාත්‍රියේ පැවැත්විණි.ඒ කැලිෆෝනියාවේ බෙවර්ලි කඳුවැටියේ The Beverly Hilton හෝටලයේදීය.ඩික් ක්ලාක් සමාගම සහ හොලිවුඩ් විදෙස් ප්‍රවෘත්ති සම්මේලනය නිෂ්පාදනය කළ මෙහිදී උත්සවය මෙහෙයවන්නා ලෙස කටයුතු කළේ ජිමී ෆැලන්ය.මෙහිදී ජීවිත කාලයට එක්වරක් පිරිනැමෙන ගෞරව සම්මානයවන සෙසිල් බී. ඩිමිලේ සම්මානය දිනාගත්තේ ඔස්කාර් සම්මානලාභී නිළි මෙරිල් ස්ට්‍රිප්ය.එහෙත් ඇය සම්මානය ලබාගත් මොහොතේ පටන් තම සම්මානය ආයුධයක් කරගනිමින් ඇමෙරිකානු ජනාධිපති ට්‍රම්ප්ට පහර පිට පහර දුන් අතර, වත්මන් ජනාධිපති ඩොනල්ඩ් ට්‍රම්ප් දැඩි ලෙස විවේචනයට ලක්කළාය.අනුකරණවාදී ජනමාධ්‍ය හේතුවෙන් චිත්‍රපට ලෝකයේ පමණක් සිදුවන සැබෑ ලෝකයේ සිදුනොවන සිදුවීමක් වත්මන් ඇමෙරිකාවට සිදුවී ඇති බව පැවසූ මෙරිල් ස්ට්‍රිප්,රටේ ගෞරවාන්විත අසුනට මෙවන් ඉරණමක් අත්වේ යැයි තමන් කිසිදිනෙක නොසිතූ බවද මෙහිදී පැවසුවාය.ඒ අනුව ඇයගේ මෙම අභීත කතාවට මේ වනවිටත්, සමාජ වෙබ් අඩවි ජාල හරහා පැසසුම් ලැබෙන අතර හොලිවුඩ් නිළියන් වැඩි පිරිසක් ඇයව අගය කිරීම කැපී පෙනේ. මේ ඉන් කිහිපයකි.
Ellen DeGeneres:
මෙරිල් ස්ට්‍රිප් වගේ ගැහැනියක් තවත් නැහැ.මම කැමතියි ඇගේ කතාවට
Katie Holmes:
අපි අපේ ගෞරවය මෙරිල් ස්ට්‍රිප්ට පුද කළ යුතුයි.ඇය මෙවර ගෝල්ඩන් ග්ලෝබ් සම්මාන උලෙළේදී තමන්ගේ සලකුණ නොමැකෙන ලෙස සටහන් කරනු ලැබුවා.ඇත්තටම අද රාත්‍රියේ ඇය පැවැත්වූ කතාව අතිවිශිෂ්ටයි.ඇත්තෙන්ම සැබෑවක්.මම සැමදා ඇය සමගයි.ඇයට හදවතින්ම සුබ පතනවා ඇගේ සම්මානයට.
Sharon Stone:
මෙරිල් ස්ට්‍රිප් මේ තරම් ප්‍රසාදයට ලක්වුණේ නැතිව ඇති කවදාවත්.ඇගේ හඬ කවදාවත් මෙච්චර ප්‍රබල වුණේ නැහැ.
Alyssa Milano:
සැබෑ ප්‍රබෝධයක්.මෙරිල්,ඔබ ඇත්තටම ශෝභමාන කාන්තාවක්.බොහොම ස්තුතියි ඔබේ හඬ නිසි අවස්ථාවේදී භාවිත කිරීම වෙනුවෙන්.ඒත් මම පුදුම වෙනවා මේ කතාවම පිරිමියෙක් කළා නම් මෙවැනිම ප්‍රතිචාරයක් ලැබුණොත්!
Laverne Cox:
ඇය හැමදෙයක්ම පැවසුවා.බොහොම ස්තුතියි, මෙරිල් ස්ට්‍රිප් ඔබේ කාර්යභාරයට.ඔබ හැමදෙයක්ම මේ රාත්‍රියේදී පැවසුවා.
එසේම ඇගේ කතාව දෝෂ දර්ශනයට ලක්කළ පණිවුඩද දකින්නට ලැබිණි.
Meghan McCain:
මෙරිල් ස්ට්‍රිප්ගේ කතාව නිසා තමයි ඩොනල්ඩ් ට්‍රම්ප් ජයග්‍රහණය කළා කියන්නේ.තාමත් හොලිවුඩ් ජනතාව ඇයි සහ කොහොමද ජනාධිපති ඩොනල්ඩ් ට්‍රම්ප්ට සහයෝගය දක්වන්නේ යන ප්‍රශ්නයට පිළිතුරු හොයන්න පටන් අරන් නොමැති බව මෙයින් පැහැදිලියි.
Emmy Rossum:
මම නම් තවදුරටත් මෙරිල්ට ආදරේ කරන්නේ නැහැ.ඇත්තමයි. ජනාධිපතිවරයා තේරුණේ හොලිවුඩ් තරුවල ට්විටර් පණිවුඩවලින්ද? මොනවද ඔබ මේ කියවන්නේ? ඔබට වෙන වැඩක් නැද්ද ?
කෙසේ වෙතත් තෙවරක්ම ඔස්කාර් සම්මාන දිනූ සුපිරි හොලිවුඩ් නිළි මෙරිල් ස්ට්‍රිප්ට ඉතා ඉක්මනින් පිළිතුරු සැපයීමට වත්මන් ඇමෙරිකානු ජනාධිපති ඩොනල්ඩ් ට්‍රම්ප් සිය ට්විටර් ගිණුම භාවිත කර ඇති අතර එහි සඳහන් වී ඇත්තේ මෙසේයි.
“මෙරිල් ස්ට්‍රිප් යනු හිලරිවාදියෙක්(හිලරි ක්ලින්ටන් පාක්ෂික නිළියක්). ඇය මෙසේ හැසිරුණත් ඉතා විශිෂ්ට ගණයේ හොලිවුඩ් නිළියක්.හැබැයි ඇය එදා ගෝල්ඩන් ග්ලෝබ් රාත්‍රියේදී මෙසේ හැසිරුණේ තමන්ගේ නායිකාවගේ පරාජය ඉවසුම් නොදීම නිසයි.”
