මැඩෝනාගේ ළමා රෝහල විවෘත කරයි
මලාවි දේශය, දුප්පත්කමින් පීඩාවිඳින ජනතාවක් වෙසෙන රටක් බව අමුතුවෙන් කිවයුතු කාරණාවක් නොවේ. නමුත් සුපිරි පොප් ගී තරුව, මැඩෝනා මේ රටේ අසරණ දරුවන්ට දක්වන්නේ දැඩි සෙනෙහසක් බව සඳහන් කළ යුතුයි. ඒ හේතුවෙන් ඇය, මලාවි දේශයේ අසරණ දරුවන් සිවුදෙනෙකු හදාවඩා ගනිමින් සිටින බව විදෙස් මාධ්‍ය සඳහන් කරයි. පසුගියදා මෙම සුපිරි තාරකාව දරුවන් සිවුදෙනාද කැටුව මලාවි දේශයට පිටත්ව ගියේ එහි ඉදිකර තිබෙන ළමා රෝහලක් විවෘත කිරීමේ අවස්ථාවට සහභාගි වීමටය. මලාවියේ බ්ලැන්ටයර් නගරයේ ඉදිකර ඇති මේ ළමා රෝහල ඇඳවල් 50කින් සමන්විත බව සඳහන් වේ. මැඩෝනා විසින් මෙම රෝහල ඉදිකරන ලද්දේ ඇය විසින් ආරම්භ කරන ලද ‘%Raising Malawi’ නම් වූ සමාජ සත්කාරක වැඩසටහන යටතේය.
ළමා රෝහල විවෘත කළේ මලාවියේ ජනාධිපති ආතර් පීටර් මුතාරිකා වන අතර, "මර්සි ජේම්ස්" ළමා රෝහල යනුවෙන් මෙම රෝහල නම්කර ඇත්තේ මැඩෝනා විසින් දරුකමට හදාවඩා ගත් එක් දරුවකුගේ නම එය වීම හේතුවෙනි. රෝහල විවෘත කිරීම නිමිත්තෙන් එම රෝහල් පරිශ්‍රය මලාවියේ ජාතික කොඩිවලින් සහ වෙනත් සැරසිලිවලින් අලංකාර කර තිබූ බවද සඳහන් වේ. එම අවස්ථාවට මලාවි දේශයේ කලාකරුවන් රැසක් සහ සුපිරි හොලිවුඩ් නළු ලියනාඩෝ ඩිකැප්රියෝද සහභාගි වී සිටියහ. ඔහු "Raising Malawi" වැඩසටහනට ආධාර කළ ප්‍රධාන දායකයෙකි. මැඩෝනා මෙහිදී පැවසුවේ තමන් නිදහස වෙනුවෙන් සටන් කරන කලාකාරියක් බවත්, එමෙන්ම කාන්තා අයිතිවාසිකම් වෙනුවෙන් කතා කරන සටන්කාමී හදවතක් ඇති තැනැත්තියක බවත්ය.
