මැඩෝනා පදිංචිය මාරු කරලා
අනාථ දරුවන් හදාවඩා ගැනීම බොහෝ සුපිරි කලාකරුවන් වෙතින් සිදුවන උතුම් ක්‍රියාවක් බව බොහෝදෙනා දන්නා කරුණකි. ඒ අතරින් සුපිරි ගායිකා මැඩෝනාට දරුකමට හදාගත් දරුවන් හතර දෙනකු සිටින බව ප්‍රසිද්ධ කාරණාවකි. එයින් එක් දරුවකු වන්නේ එකොළොස් වියැති ඩේවිඩ්ය. මේ දරුවාගේ මවු රට මලාවි දේශයයි. මැඩෝනාගේ භාරයට ඔහු එකතු වී ඇත්තේ, 2006 දීයි.
ඔහු දැන් මූලික අධ්‍යාපනය ලබන්නේ පෘතුගාලයේ ලිස්බන් නුවරයි. පෘතුගාලයේ පාසලකට ඇතුළත් කිරීමට කලින් ඔහු ලිස්බන් නුවර පිහිටි පුහුණු මධ්‍යස්ථානයකට ඇතුළත් කර තිබේ.
එය සාර්ථකව හදාරා ඇති නිසා ළඟදීම ඔහුව ලිස්බන් නුවර උසස් පාසලකට ඇතුළත් කරන්නට මැඩෝනා බලාපොරොත්තු වන බවයි සඳහන් වන්නේ. කෙසේවුවත් මෙම කාරණාව නිසා මැඩෝනා ලිස්බන් නගරයෙන් මඳක් දුරින් පිහිටි පැරණි නිවසක් මිලදී ගෙන ඇතැයි වාර්තා වේ. 19 වැනි සියවසට අයත් මෙම නිවස මැඩෝනා විසින් මිලදී ගෙන ඇත්තේ පවුම් මිලියන 7කටය. දැනට මෙහි අලුත්වැඩියා කටයුතු සිදුකෙරේ. සිය පුතුගේ අධ්‍යාපනයෙන් පසුව නැවතත් තම මව්රට බලා ඒමට ඇය තීරණය කර ඇති බවද සඳහන් වේ.
