ජනප්‍රිය බොලිවුඩ් නළු අක්ෂේ කුමාර් රෝහල්ගත කරයි
කොවිඩ්-19 වැළඳී සිටින ඉන්දියාවේ ජනප්‍රිය බොලිවුඩ් නළු අක්ෂේ කුමාර් රෝහල්ගත කර ඇති බව විදෙස් මාධ්‍ය වාර්තා කරයි.
අක්ෂේ කුමාර් අප්‍රේල් 05 වන දින ටිවිටර් පණිවුඩයක් නිකුත් කරමින් කියා සිටියේ, තමා වෛද්‍ය උපදෙස් යටතේ සෞඛ්‍යාරක්ෂිතව සිටින බවයි.
පසුගිය දා ඔහු කොරෝනා ආසාදිතයෙකු ලෙස තහවුරු වී ඇති බව වාර්තා විය.
බොලිවුඩ් අධ්‍යක්ෂකවරයෙකු සහ ඔස්කාර් සම්මානයට නිර්දේශ වූ නිෂ්පාදකවරයෙකු වන අමීර් ඛාන්ට ද පසු ගිය මාසයේදී කොරෝනා ආසාදනය වී ඇති අතර පසු ගිය සතියේ රන්බීර් කපූර්ගේ පෙම්වතිය වන ආලියා භත්ට ද කොරෝනා ආසාදනය වුණු බව ඉන්දීය මාධ්‍ය වාර්තා කළේය.
මේ අතර, දකුණු ඉන්දියාවේ ජනප්‍රිය නළුවන් වන ආර් මාදවන් සහ විකී කෞෂාල්ටද කොරෝනා ආසාදනය වී ඇත.
පසුගියදා (අප්‍රේල් 07) දිනයේදී ඉන්දියාවේ කොවිඩ් ආසාදිතයින් 96982ක් වාර්තා වී ඇති අතර වසංගතය ආරම්භ වූ දා සිට මේ දක්වා කොරෝනා ආසාදනය වී ඇති මුළු රෝගීන් සංඛ්‍යාව මිලියන 12.6ක් පමණ වේ.
ඉන්දියාවේ මහාරාෂ්ට්‍ර ප්‍රාන්තයේ කොවිඩ්-19 රෝගීන් සංඛ්‍යාව ඉහළ යාම හේතුවෙන් එම ප්‍රාන්තයට රාත්‍රී කාලයේදී ඇඳිරි නීතිය පනවා ඇත.
