අපූරු ප්‍රචාරක කටයුත්තක්
අගෝස්තු 25 වැනිදා බොලිවුඩයට සමගාමීව ලොවපුරා ප්‍රදර්ශනය වීමට නියමිත රාජ් නදිමෝරුගේ ‘අ ජෙන්ට්ලිමන්’ චිත්‍රපටයේ ප්‍රචාරක කටයුතු මේ දිනවල සිදුවේ. පසුගිය සති අන්තයේදී මෙම චිත්‍රපටයේ ප්‍රචාරක කටයුත්තක් මුම්බායි නගරයේදී සංවිධානය කර තිබුණ අතර, චිත්‍රපටයේ ප්‍රධාන චරිත නිරූපණය කරන සිද්ධාර්ත් මල්හෝත්‍රා හා ජැක්ලින් ෆර්නැන්ඩෙස්ද සහභාගිවී තිබුණි.
මෙම ප්‍රචාරක කටයුත්තේ විශේෂත්වය නම් සිද්ධාර්ත් මෙන්ම ජැකලින්ද යතුරුපැදියකින් පැමිණ මෙම ප්‍රචාරක කටයුතු සඳහා සහභාගිවීමය. එමෙන්ම ප්‍රචාරක කටයුත්ත නිමාවූ පසුව සිද්ධාර්ත් හා ජැකලින් දෙදෙනා මුම්බායි නගරය තුළ සිය යතුරුපැදියෙන් ගමන් කර තිබෙන බව සඳහන් වේ. මෙම ප්‍රචාරක කටයුත්ත නිමාවීමත් සමග සිද්ධාර්ත් මල්හෝත්‍රා ශ්‍රී ලංකාවට පැමිණ ඇති අතර, ඒ ඉන්දියාව හා ශ්‍රී ලංකාව අතර, දඹුල්ලේ පැවැති එක්දින ක්‍රිකට් තරගය නැරඹිම සඳහාය.
