රිතික්ට, ජුහී චව්ලාගෙන් හිතාගන්න බැරි විදිහේ තෑග්ගක්
රිතික් රෝෂන් කියන්නෙ බොලිවුඩයට ආදරය කරන හැමෝම දන්න කියන සුපිරි තරුවක්. ඒ වගේම තමයි, බොලිවුඩයේ දක්ෂතම නැට්ටුක්කාරයන්ගේ ලැයිස්තුවේත් ඔහු ඉන්නවා. ඒ නිසාම ඔහුට ආදරය කරන පිරිස් බොහෝමයි.
පසුගිය දවස්වල නම් ඔහු ගැන වැඩිපුර දකින්න අහන්න ලැබුණේ නෑ. විශේෂයෙන්ම සුසෑන්ගෙන් දික්කසාද වුණාට පස්සෙ, කන්ගනා එක්ක රිතික් පැටලුණා කියන එක බොලිවුඩයම දන්න රහසක්.
කන්ගනා මේ සම්බන්ධයෙන් මාධ්‍යයටත් තොරතුරු කියලා තිබුණා. රිතික් තමන්ට ඊමේල් පණිවුඩ පවා එවූ බව ඇය කිව්වා.
ඔහු ගැන හැමෝම කතා කරන්න ගත්තේ, 10 වැනි දා ඔහුගේ උපන්දිනය යෙදී තිබුණු නිසයි. රිතික් මේ සමරන්නේ ඔහුගේ 48 වැනි උපන්දිනය.
බොලිවුඩයේ තරු බොහෝමයක් රිතික්ට සුබ පැතුම් එක් කර තිබූ අතර, ජුහී චව්ලාගේ සුබ පැතුම ඒ අතරින් විශේෂ යි.
ඇය ඔහුට සුබ පතමින් ආදරණීය සටහනකුත් එක් කර තිබුණා.
"රිතික්, ඔබට මගෙන් ගස් දහසක්... ඔබ ඉතා සුපිරි නළුවෙක්. ඔබව තිරයේ දකින විට මා විශ්මයට පත් වෙනවා. රඟපෑම, නර්තනය, කඩවසම් පෙනුම වගේම ඔබේ අවංක හදවත ගැනත් මම පුදුම වෙනවා. ඔබට දෙවියන්ගේ ආශීර්වාදය ලැබේවා. ඔබට සුබ උපන්දිනයක්."
කොහොම වුණත් රිතික්ගේ උපන්දිනය වෙනුවෙන් ඔහු නමින් මිහිතලයට ගස් 1000ක් තිලිණ කරපු එක නම්, අපූරු සංකල්පයක් වගේම ඒක හරිම ආදරණිය තෑග්ගක් බව නොකියම බෑ.
මේ අතර, රිතික්ගේ උපන්දිනය දා ඔහුගේ මීළඟ චිත්‍රපටයේ පෝස්ටරයක්ද අන්තර්ජාලයට නිකුත් වුණා.
